Philippians 2
Káráísiti Áánútu aísamaivimba máyowana áwíꞋa anómba umánkarain-kwasai.
1Ísu Káráísitiyemo tarúmaimo máyáamba kwemá kwétiravayaiye. Áánútumo kwenarumbó tímakaimba asirayámbá tímakaiye. Áánútun-amankomo arumbó tímakaimba moórávimba máyáawe. tirumbá umátínkávaꞋa kwénaaeꞋa túwaꞋnaa umai máyáawe. mirámó íyaꞋo éꞋa 2mimbórá-ímáyáá umái méꞋa moórá-tirumba maꞋmái méꞋa kentirumbó tímaꞋmaeꞋo naaíyamba sirunkó anón-kaweꞋa íníye. 3mayáímó kwémayaamba íma kentúma maé iyéꞋa kesúwíꞋa maimaé iyígwáe íma séꞋa Áánútu aísamaivimba méꞋa óꞋowiyaveꞋa séꞋa kentáá usáyaaitaraawe seró. 4íma kesáváíyé suꞋmai túwaꞋnaa eꞋa amáparawai túwaꞋnaa oro. 5Ísu Káráísitimo imáyáamo intembá maarán-ímáyáá oro.6Ísu Káráísiti Áánúturaamba umái ména kwená asirayánkómó intembá umái ména minásíráyámbá íma tokéna 7ivátuwena umarankááníꞋa mórun-úwana moórá-ininko marankówana anón-éna kwayó-kwáásíráámbá umái ména 8kwaásiraamba umái máyowasa awánowana Áánútu aísamaivimba kumbéna puwínín-aintavena owé simái kató éna íma úwoi pukáivo sáwíꞋa ésa taairaꞋá inkamúwana pukáiye. 9mirá uráintavena Áánútu pukáimpinkemba usásinankena sanaan-úramba móankena amáparawai túwíkaꞋa kwenáwíꞋa anómba umánkowasa 10pósa Ísu áwíꞋo tánááombo ésa anómban-iye sésa amáparawai kívaesa kwíyómpakewaiye marapákéwáíyé kwaántái marupákéwáíyé kívairesa 11avoraꞋá Ísu Káráísitintavesa sésa Ísóigoman-iye sésa Áánútumba kentáásivowa áwíꞋa mósá maránááowe.
kwaásivimba sáma kamátinkeꞋa máéro siráin-kwasai.
12mindáyaveꞋa kesí kwaásiyo ísáaro. keinárawate máyaawandaraꞋa kesáái ísámae iráantemba ívéꞋa íma keinárawate máyaundaraꞋa kesáái iséꞋa Áánútumo sáwí-imayaao tátokaimpinkemba iyátinkena kawer-ámpáꞋó métinkarain-aimba imáyáa éꞋa kwentávéꞋa kwéeꞋa kwenáái tuwáúnavo séꞋa táátaveꞋa kwéeꞋa asiramái kwená mayáí máyáaro. 13Áánútu aamoimó kwéim-bayai mayánáe séꞋa kwéontavena kentirumpimbá mayáí maimaé kwéiyisaꞋa póꞋa táátaveꞋa kwéeꞋa kawer-ámpáꞋá kwaꞋmaé kwégowe.14íma íꞋái tinkéꞋa íma aaisambá tiyéꞋa miráumai máéro. 15mirámó éꞋa kawer-úramba umái máíyana póna kentí sáwí-meyamba íma kwéniye. marapáꞋó sáwí-ambo kwarésamo kaeꞋnáéꞋo úmae nááón-kwaasivimba keinárawaꞋa Áánútuna kwaási méꞋa sáwí-imayaa kempímbá íma kwáyainaꞋa póꞋa sáma kamátinkeꞋa 16maíꞋmaiꞋo ónááon-aimba kentirumpimbá asiramái tátokaiyaꞋa póꞋa Ísu Káráísiti kumíndaraꞋa aamoí éꞋa séꞋa komáyaawanda póꞋa maíꞋmaiꞋo ónááon-aimba tirumpimbá asiramái tátoraamba póꞋa séꞋa íma úwoisan-tantaataveꞋa mayáí kwémaeꞋa méraumne sénaumne.
17Áánútuna aamoi-yántááꞋó áménteniꞋa umái kwenkáꞋá agevamái máyáawe. Áánútuntavesamo imáyáaamo ésamo ándá-aran-dombo átímaraanteniꞋa umái kembó sínkamiyanamo kesí naaemó kumínaꞋo púwónanamo éna ándá-aran-donkaamba kumíníye. mirámó ondamó éna kesirunkó kaweꞋá ínímba póna kentirunkógwáráꞋá kaweꞋá íníye. 18miráumai kesirunkómó kaweꞋó índantemba kentirunkógwáráꞋá miráumai kaweꞋá íníye.
Tímótiye Épavarotaitasi miwítí kwaasái.
19sáwíyankaꞋa Tímótimba aiꞋmáráanana kentópaꞋa kwíníntaveꞋa Ísu KáráísitimpaꞋa námúnaavinkemba kwéaisaa-unda póna kentópaꞋa kuréna koyauweréna kesópaꞋa téna kentáái másimasiminaꞋa iséꞋa aamoí ónaumne. 20kwesé keiráíyé suꞋmai keinárawatavekai anón-imayaa ékai sékai kawerá umái máya. sáwíra umái máyaao kwésuvo 21évakarawai kesáváí-ímáyááwé suꞋmai ésa Ísu Káráísitina imáyáa íma kwéowe. 22ánivo ááninkomo avowáná mayáímó áwaꞋnaa intembá áséi-kwasaiyavena Tímóti kembá kwésuwaꞋnaa in-áímbá ísaraawe. 23kesópaꞋo tínín-tantaaꞋa amuꞋmaꞋmái awánéꞋa Tímótimba aiꞋmáráanana kentópaꞋa kwínaꞋa 24kemá sáwíyankaꞋa kentópaꞋa kónaundayaveꞋa ÍsóigompaꞋa kwéaisaa-eꞋa kwéamuꞋmaraumne.25imáyáa éꞋa kesí kwaásigo áwíꞋa Épavarotaitasi aiꞋmáráanana kentópaꞋa kwíníye. mirá ónaumne kwésune. aiꞋmárówana kesópaꞋa téna kentáái másimasimena kesí umbai-máyáí tagwésuwaꞋnaa-ena kesé asirayám-báyáí kwémayaisana 26áíꞋa isaꞋá kwenáái ísáawana kwemá iséna anón-imayaa éna síꞋo imbá asóvamasinkain-aimba kosimátimenae simbá póꞋa aiꞋmáráanana kwíníye. 27áraiꞋa áíꞋa isaná puwíndayavena kwéisana Áánútu arumbá umánkena asóvamankaraiye. umbai-yántááꞋá kempímbá kwáyáinkaꞋa póna puwínana óꞋon-umbai-yantaaꞋa tivó séna Áánútu arumbá umásinkena asóvamankaraiye. 28mindáyaveꞋa aiꞋmáráandayaveꞋa aamoí únana kentópaꞋa kwínaꞋa awánéꞋa aamoí íyaꞋa íma anón-imayaa ónaumne. 29kentópaꞋa kwínaꞋa awánéꞋa aamoí umánkeꞋa ÍsóigompaꞋa súwi síyana tirunkó anón-kaweꞋa íníye. mirán-kwáásí táái mósá máráaro. 30íma kanaán-umai tasúwaꞋnaa ontávéna kentí anondá kwemá téna kovuwúnavo íma simbá úwoi tasúwaꞋnaa ena Ísu Káráísitina mayáí kwémayaimba puwíndayavena uráivo kwembá awánéꞋa kwenáái mósá máráaro.
Copyright information for
KZE